A RECOMPENSA

A profesora María José Andión intervén, en calidade de Xefa de Estudos, nun acto público destinado a promover a inclusión educativa

María José Andión

(Xefa de Estudos. IES Perdouro)

Cando asumín a responsabilidade da Xefatura de Estudos do IES Perdouro, a miña principal preocupación era a atención á diversidade no que atinxe ao alumnado estranxeiro. O meu primeiro obxectivo era  darlle a este alumnado unha atención "digna" e "integral". 

Agora, ao visionar a gravación do acto de inauguración da exposición de fotografías dunha nosa ex-alumna, síntome emocionada e satisfeita ao escoitar a música e comprobar que un dos gaiteiros é un rapaz que chegou ao instituto un 7 de xaneiro de 2016. Un ano e catro meses de esforzo, traballo e dedicación, foron suficientes para que este alumno sexa un modelo de inclusión nos ámbitos académico, social, cultural e lingüístico. Sen dúbida, a mellor e maior recompensa que pode ter o traballo que desde Xefatura de Estudos se levou a cabo nestes dous anos coa finalidade de ofrecer ao alumnado estranxeiro recén chegado a atención persoal e académica que merecen.