CRÓNICA DE VIAXE POR TURQUÍA

 María Fuente

Vouvos facer partícipes da miña viaxe por Turquía. Todo comezou hai uns anos en Bulgaria. Fixera unha viaxe para participar nun encontro de música a celebrar na cidade de Sofía por iniciativa dun proxecto europeo. Nesa viaxe fun co meu amigo Juan, tamén músico-terapeuta, con quen comparto iniciativa de músico-terapia en Asturias. 

Estando en Bulgaria, Juan coñeceu unha moi linda rapariga turca chamada Ceren e o que parecía ser un romance de Erasmus+ continuou no tempo e chegou á celebración dunha voda en Ankara.

Considérome un pouco responsábel desa relación xa que fora eu quen convidara o amigo Juan a vir comigo a aquel encontro de emprendemento social e de cultura sustentábel celebrado en Bulgaria.

A voda foi moi divertida, con moita música en directo e moito baile, e observei diferenzas coas vodas en España. Por exemplo, os noivos comen antes da cerimonia porque despois non teñen tempo. A música e o baile fanse ao mesmo tempo que se fai a comida. Os convidados teñen o costume de dar diñeiro aos músicos mentres estes tocan. Tamén se venden as fotografías da voda no mesmo día.

Este é un dos motivos polos que estou aquí. Tamén porque me gusta moito viaxar e quería  coñecer a Capadocia, un lugar máxico. Encantoume!!

Agora escribo estas impresións mentres estou no tren camiño de Istambul, onde estaremos uns días. 

Vémonos! Apertas!!!

A autora da crónica durante a viaxe á Capadocia.

MARÍA FUENTE naceu en Madrid e vive en Lourenzá. É doutoranda na Universidade de Santiago de Compostela. A súa tese titúlase Do pensamento musical grego clásico á Musicoterapia: unha exploración filosófica e científica. Con ela quere buscar os vínculos entre o pensamento musical e a evidencia científica. 

Esta crónica é tamén un exercicio para o Curso de Lingua Galega para Neofalantes, celebrado na Escola de Arroxo.